بین الصوبائی گروہ گرفتار

April 25, 2008 · موضوع تازہ ترین

تھانہ صدر پولیس نے ایک بین الصوبائی گروہ گرفتار کر کے ان کے قبضہ سے چھینی گئی ٧ گاڑیاں برآمد کر لی ہیں۔ اس کی تفصیلات ڈی پی او ڈیرہ غازی خان چوہدری مقصود الحسن نے پریس کانفرنس کرتے ہوئے بیان کیں کہ شہری کی اطلاع پر صدر پولیس نے گلشن اعجاز کے علاقے میں چھاپہ مارا تو ملزموں رجب علی وغیرہ نے فرار ہونے کی کوشش کی تاہم پولیس نے ملزموں کو قابو کر لیا۔ دوران تفتیش ملزم رجب علی، اس کے بھائی اصغر علی، عاشق حسن، چچا شاہنواز سکنہ موضع درخواست جمال، عبدالقیوم ڈاہا اور اورنگزیب کھتران کی نشاندہی پر کراچی سے چھینی اور چوری کی گئی ٦ کاریں جبکہ لاہور سے چھینی گئی ایک کار برآمد کر لی گئی ہے۔
ڈی پی او ڈیرہ نے مزید بتایا کہ یہ گروہ گاڑیاں چھینے کے بعد ٹریکر سسٹم کو ناکارہ بنا دیتا تھا اور بعد میں ان گاڑیوں کو بلوچستان کے علاقے رکنی میں فروخت کر دیا جاتا تھا۔ گروہ کا سرغنہ رجب علی ہے جو تھانہ صدر کے کار چوری کے مقدمہ نمبر ٧١٧/٠٧ میں بھی مطلوب تھا۔ ملزموں کا عدالت سے ٤ روزہ جمسانی ریمانڈ حاصل کر لیا گیا ہے۔
ہمارے ذرائع کے مطابق اسی گروہ نے سابق ایس ایچ او راجن پور واحد بخش کی گاڑی چوری کرنے بعد بھونگا وصول کر کے گاڑی واپس کی تھی۔ ملزم عبداقیوم کا تعلق جامپور سے ہے اور وہ ایک سابق ڈی ایس پی کا برادر نسبتی بتایا جاتا ہے اور مزید یہ کہ برآمد ہونے والی ان کاروں میں ایک کار ضلع مظفرگڑھ کی سیاسی شخصیت کے قریبی عزیز کے زیر استعمال تھی۔